ເພື່ອປະຕິບັດຕາມ ທິດທາງການປັບປຸງ ຂອງ ລັດຖະບານ ວັນທີ 22 ມີນາ 2021 ທະນາຄານສົ່ງເສີມກະສິກຳ ໄດ້ເຊັນສັນຍາຮ່ວມທຶນ ກັບ ບໍລິສັດ ພົງຊັບທະວີ ກໍ່ສ້າງ-ຂົວທາງ ເຄຫາສະຖານ ແລະ ຊົນລະປະທານ ຈຳກັດຜູ້ດຽວ ຊຶ່ງຖືຮຸ້ນ 70% ແລະ ທສກ ຕາງໜ້າລັດຖະບານ ແມ່ນກະຊວງການເງິນ ຖືຮຸ້ນ 30% ), ດຳເນີນທຸລະກິດ ພາຍໃຕ້ ການຄຸ້ມຄອງຂອງທະນາຄານແຫ່ງ ສປປ ລາວ ແລະ ລະບຽບກົດຫມາຍຂອງ ສປປ ລາວ ວາງອອກໃນແຕ່ລະ ໄລຍະ, ພ້ອມທັງປະຕິບັດຕາມ ສິດຂອບເຂດ ພາລະບົດບາດຂອງຕົນ ໃນການພັດທະນາເສດຖະກິດສັງຄົມຂອງຊາດ.
ທະນາຄານສົ່ງເສີມກະສິກຳ ສ້າງຕັ້ງຂຶ້ນຕາມດຳລັດຂອງນາຍົກລັດຖະມົນຕີ ເລກທີ 92/ນຍ ລົງວັນທີ 19 ມິຖຸນາ 1993, ໃຊ້ຕົວອັກສອນຫຍໍ້ “ທສກ” ເປັນທະນາຄານພັດທະນາຕາມຂະແໜງການ ເປັນອົງການນິຕິບຸກຄົນ ໂດຍມີຈຸດປະສົງເພື່ອສະໜອງສິນເຊື່ອ ເຂົ້າໃນການພັດທະນາຂະແໜງການກະສິກຳ-ປ່າໄມ້ ເປັນຕົ້ນຕໍ, ດຳເນີນທຸລະກິດໂດຍບໍ່ສະແຫວງຫາຜົນກຳໄລ, ສະໜອງສິນເຊື່ອດ້ວຍອັດຕາດອກເບ້ຍຕໍ່າໃຫ້ຊາວກະສິກອນທັງເປັນລາຍກຸ່ມ ແລະ ລາຍບຸກຄົນ ດ້ວຍແຫຼ່ງທຶນຂອງລັດຖະບານ ແລະ ອົງການຕ່າງໆສະໜອງໃຫ້, ທສກ ໃນເວລານັ້ນບໍ່ໄດ້ເຮັດໜ້າທີ່ລະ ດົມເງິນຝາກ, ດຳເນີນງານພາຍໃຕ້ລະບຽບຄຸ້ມຄອງທີ່ແຕກຕ່າງຈາກສະຖາບັນການເງິນອື່ນ. ມີທຶນຈົດທະບຽນເບື້ອງຕົ້ນທັງໝົດ 1,000,000,000 ກີບ (ໜຶ່ງຕື້ກີບ) ແບ່ງເປັນ 1,000,000 ຮຸ້ນ, ຮຸ້ນລະ 1,000 ກີບ ໂດຍແມ່ນກະຊວງການເງິນເປັນຜູ້ຖືຮຸ້ນ 80% ຂອງຈຳນວນຮຸ້ນທັງໝົດ.
ວັນທີ 21 ມິຖຸນາ 1993 ຜູ້ວ່າການທະນາຄານແຫ່ງ ສປປ ລາວ ໄດ້ອອກຂໍ້ຕົກລົງ ເລກທີ 45/ທຫລ ວ່າດ້ວຍການແຍກກິດຈະການສິນເຊື່ອຊົນນະບົດອອກຈາກ ທະນາຄານນະຄອນຫຼວງ ແລະ ທະນາຄານເສດຖາທິລາດ, ຈາກ ນັ້ນ ຄະນະກະກຽມສ້າງຕັ້ງ ທະນາຄານສົ່ງເສີມກະສິກໍາ ໄດ້ແຍກຊັບສິນ, ພະນັກງານຈຳນວນໜຶ່ງອອກຈາກສອງທະນາ ຄານດັ່ງກ່າວ ເພື່ອຮັບປະກັນໃຫ້ ທະນາຄານສົ່ງເສີມກະສິກໍາ ທີ່ໄດ້ອະນຸມັດສ້າງຕັ້ງຂຶ້ນ ສາມາດເຄື່ອນໄຫວຕາມພາລະບົດບາດຂອງ ຕົນ ແລະ ເປີດການບໍລິການໃຫ້ລູກຄ້າໃນນະຄອນຫຼວງວຽງຈັນ ແລະ ແຂວງຕ່າງໆ ທົ່ວປະເທດ.
ໃນວັນທີ 18/08/1993 ທະນາຄານສົ່ງເສີມກະສິກຳ ໄດ້ເປີດພິທີຂຶ້ນຢ່າງເປັນທາງການໂດຍມີສຳນັກງານໃຫຍ່ຢູ່ທີ່ນະຄອນຫຼວງວຽງຈັນ, ມີໂຄງສ້າງການຈັດຕັ້ງຄື: ສະພາບໍລິຫານ 6 ທ່ານ ເຊິ່ງປະກອບດ້ວຍ ທ່ານຮອງຜູ້ວ່າການທະນາ ຄານແຫ່ງ ສປປລາວ ເປັນປະທານ, ຜູ້ອຳນວຍການ ເປັນຮອງປະທານ, ກະຊວງການເງິນ, ກະຊວງກະສິກຳ, ກະຊວງການຄ້າ ແລະ ກົມສິນເຊື່ອ ທະນາຄານແຫ່ງ ສປປ ລາວ ເປັນສະມາຊິກ; ມີຄະນະອຳນວຍການ 2 ທ່ານ, ມີ 4 ພາກສ່ວນທີ່ຕົ້ນຕໍຢູ່ສຳນັກງານໃຫຍ່ ຄື: ຫອ້ງການ, ຈັດຕັ້ງ, ບັນຊີ ແລະ ສິນເຊື່ອ, ມີພະນັກງານປະກອບເບື້ອງຕົ້ນທັງໝົດ ຈໍານວນ 52 ຄົນ ຍິງ 17 ຄົນ.
ນັບແຕ່ ເດືອນມີນາ 2000-2006 ທະນາຄານກໍ່ໄດ້ດຳເນີນການເຄື່ອນໄຫວພາຍໃຕ້ດຳລັດ ວ່າດ້ວຍທະນາຄານທຸ ລະກິດ, ການໃຫ້ສິນເຊື່ອແມ່ນເລັງໃສ່ການປະຕິບັດແຜນງານ ແລະ ໂຄງການຂອງລັດຖະບານດ້ວຍ ອັດຕາດອກເບ້ຍຕໍ່າ ທສກ ໄດ້ສຸມໃສ່ໃນການລະດົມແຫຼ່ງທຶນເຂົ້າສູ່ລະບົບເປັນຕົ້ນຕໍ, ເພີ່ມໜ້າທີ່ການບໍລິການ ແລະ ຊຳລະສະສາງຫຼາຍຂຶ້ນ, ໄດ້ມີລູກຄ້າເງິນຝາກທຸກປະເພດຫຼາຍຂຶ້ນ, ຄຽງຄູ່ກັບການຂະຫຍາຍຕົວທາງດ້ານຕາໜ່າງການບໍລິການຢູ່ໃນທົ່ວປະເທດ, ທະນາຄານໄດ້ມີນະໂຍບາຍ ແລະ ປະຕິບັດຕາມຂໍ້ກຳນົດ, ລະບຽບການຄວາມໜັ້ນຄົງທີ່ ທະນາຄານແຫ່ງ ສປປ ລາວ ໄດ້ວາງອອກ ເຊັ່ນ: ການສ້າງຄັງແຮ, ຫັກຄ່າເສື່ອມ, ແຕ່ເນື່ອງຈາກການດຳເນີນທຸລະກິດທີ່ບໍ່ສະແຫວງຫາຜົນກຳໄລເປັນຕົ້ນຕໍ ແລະ ມີສ່ວນຕ່າງທີ່ບໍ່ເໝາະສົມ ເຮັດໃຫ້ທະນາຄານພົບຄວາມຫຍຸ້ງຍາກທາງດ້ານການເງິນ, ຄວາມພຽງພໍຂອງທຶນຢູ່ໃນລະດັບຕໍ່າ, ປີ 2007 ເປັນຕົ້ນມາ ທສກ ໄດ້ຮັບຮອງເອົາວິໄສທັດໃໝ່ຂອງຕົນ ຄື: ເປັນຜູ້ນຳໜ້າໃນການສະໜອງການບໍລິການ ການເງິນໃນຊົນນະບົດ, ດຳເນີນທຸລະກິດຕາມກົນໄກຕະຫຼາດ, ກຸ້ມຕົນເອງທາງດ້ານການເງິນແບບຍືນຍົງເພື່ອປະກອບສ່ວນໄລຍະຍາວເຂົ້າໃນການຫຼຸດຜ່ອນຄວາມທຸກຍາກ ແລະ ການຈະເລີນເຕີບໂຕທາງດ້ານເສດຖະກິດ ແລະ ຄວາມວັດທະນະຖາວອນຂອງ ສປປ ລາວ. ທະນາຄານສົ່ງເສີມກະສິກຳ ໄດ້ມີການປັບປຸງຮອບດ້ານ ເຊັ່ນ: ທາງດ້ານນະໂຍບາຍລະບຽບການ, ກົນໄກການຄຸ້ມຄອງບໍລິຫານ, ລົງທຶນໃສ່ໃນການພັດທະນາບຸກຄະລາກອນ ແລະ ຄຸ້ມຄອງຊັບພະຍາກອນມະນຸດ, ດ້ານການບັນຊີ, ບໍລິຫານຄວາມສ່ຽງ, ຍາດແຍ່ງການຊວ່ຍເຫຼືອ ແລະ ຮ່ວມມືກັບຕ່າງປະເທດທາງດ້ານເຕັກນິກວິຊາການ, ສຸມໃສ່ການພັດທະນາລະບົບຫັນເປັນທັນສະໄໝ ໂດຍສະເພາະຍົກລະດັບລະ ບົບເຕັກໂນໂລຊີຂໍ້ມູນຂ່າວສານ, ການບໍລິການທີ່ມີຫຼາກຫຼາຍຜະລິດຕະພັນເພື່ອບໍລິການລູກຄ້າ, ກໍ່ສ້າງພື້ນຖານປະ ກອບວັດຖຸເຕັກນິກເພື່ອຮອງຮັບໃຫ້ແກ່ການດຳເນີນທຸລະກິດໃນອະນາຄົດ.
ສ້າງ ທສກ ໃຫ້ກາຍເປັນທະນາຄານເພື່ອການພັດທະນາ ຢ່າງຮອບດ້ານ ໂດຍສະເພາະການພັດທະນາກະສິກຳ ຕິດພັນກັບການປຸງແຕ່ງຢູ່ຊົນນະບົດ ດ້ວຍວິທີການຄຸ້ມຄອງທີ່ທັນສະໄໝ, ໃຫ້ບໍລິການທາງດ້ານການເງິນແບບຄົບວົງ ຈອນ ແລະ ການຜະລິດເປັນສິນຄ້າ ເພື່ອຍົກສູງລະດັບຄຸນນະພາບການດຳລົງຊີວິດການເປັນຢູ່ຂອງ ຊາວກະສິກອນ ແບບຢືນຍົງ, ລົງທຶນຄົບວົງຈອນໃນການພັດທະນາກະສິກຳ-ປ່າໄມ້ ຕິດພັນກັບອຸດສາຫະກຳທັນສະໄໝ ທັງສາມາດ ເຊື່ອມໂຍງກັບພາກພື້ນ ແລະ ສາກົນ. ບືນຕົວກ້າວຂຶ້ນຈົດທະບຽນໃນຕະຫຼາດຫຼັກຊັບລາວ ເພື່ອເປັນທະນາຄານມະຫາ ຊົນ ຢ່າງແທ້ຈິງ.
ຍຸດທະສາດ1. ໃຫ້ບໍລິການທາງການເງິນທີ່ສົມບູນແບບ ເພື່ອຕອບສະໝອງຄວາມຕ້ອງການຂອງລູກຄ້າ ໂດຍເນັ້ນໃສ່ການເພີ່ມ ປະສິດທິພາບຂອງວົງຈອນການສ້າງຄຸນຄ່າດ້ານກະສິກຳ ດ້ວຍການຮ່ວມມືຂອງບັນດາຝ່າຍທີ່ມີສ່ວນຮ່ວມ.
2. ພັດທະນາການບໍລິຫານຈັດການຊັບພະຍາກອນ ຮ່ວມກັບບັນດາຝ່າຍ ເພື່ອສົ່ງເສີມສ້າງຄວາມເຂັ້ມແຂງໃຫ້ແກ່ຊາວ ກະສິກຳ ແລະ ຊຸມຊົນ ດ້ວຍການສະໜັບສະໜູນ, ແບ່ງປັນຜົນປະໂຫຍດ ຢ່າງທົ່ວເຖິ່ງ ແລະ ເປັນທຳ.
3. ບໍລິຫານທຶນໃຫ້ພຽງພໍກັບຄວາມຕ້ອງການ ພ້ອມທັງຈັດຫາທຶນທີ່ເໝາະສົມກັບລູກຄ້າ ແລະ ການດຳເນີນທຸລະກິດ ຂອງ ທສກ.
4. ສົ່ງເສີມການນຳໃຊ້ນະວັດຕະກຳ ແລະ ເຕັກໂນໂລຊີ ເພື່ອເພີ່ມປະສິດທິພາບການບໍລິຫານ ແລະ ການໃຫ້ບໍລິການ ລວມທັງການເພີ່ມຂີດຄວາມສາມາດໃນການແຂ່ງຂັນຂອງລູກຄ້າ.
5. ຍຶດໝັ້ນ ການຄວບຄຸມ ແລະ ກິດຈະການທີ່ດີ ແລະ ຢຶດໝັ້ນ ການສ້າງຄຸນຄ່າທີ່ໝັ້ນຄົງ ຍືນຍົງ ເພື່ອສ້າງຄວາມດຸ່ນ ດ່ຽງລະຫວ່າງດ້ານເສດຖະກິດ ແລະ ສິ່ງແວດລ້ອມ.
6. ປະຕິຮູບ ສ້າງເຄື່ອງມືໃນການວິເຄາະການລົງທຶນ ຊັດເຈນ ມີປະສິດທິຜົນສູງ.
7. ພັດທະນາທີມໄອທີ ພ້ອມລະບົບເຕັກໂນໂລຊີ ໃຫ້ທັນສະໄໝ, ສະດວກ, ວ່ອງໄວ, ປອດໄພ ເຂົ້າກັບວິຖີຊີວິດປັດ ຈຸບັນ ແລະ ອະນາຄົດ ທຽບເທົ່າທະນາຄານພາຍໃນທີ່ໄດ້ມາດຕະຖານ ແລະ ພັດທະນາຍົກສູງໃຫ້ສາມາດເຊື່ອມ ໂຍງກັບສາກົນ.
8. ກ້າວສູ່ຄວາມເປັນເລີດ ໃນການພັດທະນາຜະລິດຕະພັນ ແລະ ສ້າງຜົນກໍາໄລຢ່າງ ສະໝໍ່າສະເໝີ.
ວັດທະນາທຳອົງກອນ- ຄວາມຍືນຍົງ Sustainability (S): ຄວາມຍືນຍົງຂອງອົງກອນ, ພະນັກງານ, ລູກຄ້າ, ເຄື່ອຄ່າຍ, ຜູ້ຖືກ ຮຸ່ນ ແລະ ສິງແວດລ້ອມ.
- ການມີສ່ວນຮ່ວມ Participation (P): ການມີສ່ວນຮ່ວມຂອງຜູ້ທີ່ມີສ່ວນໄດ້ສ່ວນເສຍ.
- ການມີຄວາມຮັບຜິດຊອບ Accountability (A): ການຄຳນຶງເຖິງຄວາມຮັບຜິດຊອບຂອງຜູ້ບໍລິຫານ ແລະ ພະນັກງານ ທສກ.
- ການໃຫ້ຄວາມເຄົາລົບ Respect (R): ພະນັກງານ ທສກ ຕ້ອງໃຫ້ການເຄົາລົບ ໃຫ້ກຽດແກ່ຕົນເອງ, ລູກຄ້າ ແລະ ຜູ້ອື່ນ.
- ຄວາມຮູ້ Knowledge (K): ສົ່ງເສີມ ແລະ ພັດທະນາຄວາມຮູ້ ຄວາມສາມາດ ໃຫ້ກາຍເປັນວັດທະນະທໍາ ເພື່ອ ທສກ ໃຫ້ກາຍເປັນທະນາຄານ ແຫ່ງການຮຽນຮູ້ ແລະ ນຳໃຊ້ນະວັດຕະກຳໃໝ່ ເພື່ອສ້າງລາຍໄດ້ໃຫ້ແກ່ ຊາວ ກະສິກອນ.
ເພື່ອຕອບສະຫນອງຕາມນະໂຍບາຍ ແລະ ແນວທາງປ່ຽນແປງໃຫມ່ຂອງລັດຖະບານ ໃນການຫັນປ່ຽນ ແລະ ປັບປຸງກົງຈັກບັນດາລັດວິສາຫະກິດ ກໍ່ຄືທະນາຄານທຸລະກິດລັດ ໃຫ້ກາຍເປັນທຸລະກິດແບບຮ່ວມທຶນ, ສະນັ້ນ ລັດຖະບານຈຶ່ງໄດ້ຕົກລົງເຫັນດີໃຫ້ມີການເຊັນບົດບັນທຶກຄວາມເຂົ້າໃຈ MoU ກ່ຽວກັບການຮ່ວມທຶນໃນ ທະນາຄານສົ່ງເສີມ ກະສິກໍາ ລະຫວ່າງ ກະຊວງການເງິນ ແລະ ບໍລິສັດພົງຊັບທະວີ ກໍ່ສ້າງ-ຂົວທາງ ເຄຫາສະຖານ ແລະ ຊົນລະປະທານ ຈຳກັດຜູ້ດຽວ ໃນວັນທີ 22 ມີນາ 2021 ແລະ ກໍ່ໄດ້ພ້ອມກັນສຶກສາຄົ້ນຄວ້າກ່ຽວກັບ ໂຄງຮ່າງການຈັດຕັ້ງ ແລະ ບຸກ ຄະລາກອນ, ສັນຍາຮ່ວມທຶນ ແລະ ບັນຫາອື່ນໆ ທີ່ປິ່ນອ້ອມ. ຜ່ານການສຶກສາຄົ້ນຄວ້າ ແລະ ດໍາເນີນການຈັດຕັ້ງປະຕິ ບັດຢ່າງລະອຽດຮັດກຸມ ແລະ ສາມາດບັນລຸຕາມຂໍ້ກໍານົດ ແລະ ລະບຽບການຕ່າງໆທີ່ວາງໄວ້; ລັດຖະບານ ຈຶ່ງໄດ້ຕົກລົງ ເຫັນດີໃຫ້ຮ່ວມທຶນ ແລະ ໄດ້ມີການເຊັນສັນຍາຮ່ວມທຶນ ໃນວັນທີ 13 ທັນວາ 2021 ລະຫວ່າງ ກະຊວງການເງິນ ແລະ ບໍລິສັດ ພົງຊັບທະວີ ກໍ່ສ້າງ-ຂົວທາງ ເຄຫາສະຖານ ແລະ ຊົນລະປະທານ ຈຳກັດຜູ້ດຽວ.
ມາຮອດເດືອນ ກໍລະກົດ ປີ 2022 ທະນາຄານສົ່ງເສີມກະສິກໍາ ກໍໄດ້ສໍາເລັດການປັບປຸງຮູບແບບວິສາຫະກິດ ຈາກ ລັດວິສາຫະກິດ ມາເປັນ ບໍລິສັດຈໍາກັດ ແລະ ປ່ຽນຊື່ເປັນ ທະນາຄານສົ່ງເສີມກະສິກໍາ ຈໍາກັດ. ຈຸດປະສົງຂອງ ກຸ່ມບໍລິສັດ ພົງຊັບທະວີ ຕໍ່ແຜນການລົງທຶນໃນ ທສກ ຮ່ວມກັບ ລັດຖະບານແຫ່ງ ສປປ ລາວ ເພື່ອ ປະກອບສ່ວນໃນການປັບປຸງ ແລະ ພັດທະນາ ທສກ ໃຫ້ມີຄວາມເຂັ້ມແຂງຮອບດ້ານ ເປັນຕົ້ນແມ່ນ ດ້ານການບໍລິ ການ, ດ້ານເງິນທຶນ ແລະ ການໃຫ້ບໍລິການລູກຄ້າ ໂດຍອີງໃສ່ປະສົບການໃນການດຳເນີນທຸລະ ກິດຕະຫຼອດໄລຍະ 20 ປີຜ່ານມາ ຂອງບໍລິສັດເຊິ່ງໄດ້ມີປະສົບການ ໃນການຮ່ວມທຶນກັບ ທະນາຄານທຸລະ ກິດ ທັງພາຍໃນ ແລະ ຕ່າງປະ ເທດ ໃນການສະໝອງທຶນເຂົ້າໃສ່ການດຳເນີນທຸລະກິດ ຂອງກຸ່ມພົງຊັບທະວີ, ຈຶ່ງຕ້ອງການນຳເອົາບົດຮຽນ ແລະ ປະສົບການຕົວຈິງ ທີ່ສະສົມໄດ້ເຂົ້າມາໝູນໃຊ້ຢູ່ໃນ ທສກ ໃຫ້ເກີດປະ ໂຫຍດສູງສຸດ, ປະກອບສ່ວນຢ່າງສຸດຄວາມ ສາມາດ ເຂົ້າໃນການພັດທະນາຂົງເຂດກະສິກຳ-ອຸດສາຫະກຳປຸງແຕ່ງ ຂອງ ສປປ ລາວ ໃຫ້ມີການຜະລິດສິນຄ້າໂດຍ ສະເພາະສິນຄ້າສົ່ງອອກ, ປະກອບສ່ວນພັດທະນາຊົນນະບົດ ເພື່ອຊ່ວຍຍົກລະດັບຄຸນນະພາບຊີວິດການເປັນຢູ່ຂອງ ປະຊາຊົນຢູ່ທ້ອງ ຖິ່ນໃຫ້ດີຂຶ້ນເລື້ອຍໆ.
ສະນັ້ນ ສິ່ງທີ່ກ່າວມາຂ້າງເທິງ ແມ່ນເປັນໜຶ່ງໃນນະໂຍບາຍ ຂອງລັດຖະບານ ກໍຄືນະໂຍບາຍຂອງ ທສກ ພວກ ເຮົາ ໃນຍຸກໃໝ່ທີ່ເຫັນໄດ້ເຖິງຄວາມສຳຄັນ ເພື່ອເປັນການກະຕຸ້ນ, ຊຸກຍູ້ໃຫ້ທຸລະກິດ ສາມາດເຂົ້າເຖິງແຫຼ່ງທຶນໃນອັດ ຕາດອກເບ້ຍ ທີ່ສົມເຫດສົມຜົນ, ສາມາດຈັດການການບໍລິຫານແບບຄ່ອງໂຕ, ສົ່ງເສີມທາງດ້ານວຽກງານກະສິກໍາຮັບປະກັນຮັບໃຊ້ສັງຄົມພາຍໃນປະເທດ ເພື່ອຕອບສະໜອງໃຫ້ແກ່ ປະຊາຊົນ ໃນບັນດາຂອບເຂດທົ່ວປະເທດ, ຊຸກຍູ້ສົ່ງ ເສີມການຜະລິດພາຍໃນປະເທດ ເຮັດໃຫ້ປະຊາຊົນມີວຽກເຮັດງານທຳ ແລະ ເພື່ອສົ່ງອອກຕິດພັນກັບນະໂຍບາຍ ຂອງລັດຖະບານ ເພື່ອກະຕຸ້ນເສດຖະກິດ ຕາມນະໂຍບາຍຂອງພາກລັດ ກໍຄືນະໂຍບາຍຂອງລັດຖະບານ ໃນການຕ້ານ ຟື້ນຟູເສດຖະກິດ, ພວກເຮົາ ຈະສຸມໃສ່.
ປະຕິຮູບວັດທະນະທຳຂອງອົງກອນ ແລະ ແບບແຜນວິທີການເຮັດວຽກ ຂອງຄະນະຜູ້ບໍລິຫານ ລວມເຖິງພະ ນັກງານວິຊາການ ໃນຂອບເຂດທົ່ວປະເທດຂອງອົງກອນ ທສກ, ເຮັດໃຫ້ຫຼາຍໆບັນຫາໄດ້ຮັບການແກ້ໄຂໃນທາງບວກ ຢ່າງເປັນຮູບປະທໍາ, ໄດ້ກໍານົດ ແລະ ປະກາດວິໄສທັດ, ພາລະກິດ, ແຜນຍຸດທະສາດ ແລະ ແນວທາງການດໍາເນີນທຸລະກິດຂອງ ທສກ ຢ່າງໜັກແໜ້ນ ແລະ ເຫັນໄດ້ຢ່າງເດັ່ນຊັດທີ່ສຸດ ແມ່ນການຂັບເຄື່ອນທຸລະກິດໄດ້ຢ່າງວ່ອງໄວ ຂອງ ຄະນະຜູ້ບໍລິຫານ ທສກ ຊຸດໃໝ່ ທີ່ລ້ວນແລ້ວແຕ່ມີຄວາມຮູ້, ມີຄວາມສາມາດ, ມີບົດຮຽນ, ມີປະສົບການ ແລະ ເປັນມືອາຊີບບວກກັບ ການຊີ້ນຳ-ນຳພາ ຢ່າງໃກ້ຊິດ ຂອງປະທານຄະນະບໍລິຫານງານທີ່ມີວິໄສທັດກວ້າງໄກ, ມີບົດຮຽນ ໃນ ການຊີ້ນຳ-ນຳພາການດຳເນີນທຸລະກິດ, ມີຄວາມຮູ້-ຄວາມສາມາດ, ມີຈັນຍາບັນສູງ ແລະ ມີວິໄນເຂັ້ມງວດ.
| ສະກຸນເງິນ | ອັດຕາຊື້ | ອັດຕາຂາຍ |
|---|---|---|
 USD |
21,700 | 22,042 |
 THB |
627.20 | 639.50 |
 CNY |
2,953 | 3,012 |
 EUR |
22,601 | 22,822 |
 VND |
0.80 | 0.84 |
| ວັນທີ: 21-11-2024 ລາຍລະອຽດ » | ||
ຈູດບໍລິການ ATM
